احبّ ايّامنا الراحت ترد ترجع مثل اوّل
احب بيتي صخر لو طين احبّه مطرّز بچندل
احبّ ايّامنا الراحت ترد و ايّامي هذي اتزول
احبّ اتشابگ اويا الكوخ كوخ الامل طول بطول
احبّ اتوسّد الحلفا لو دوشگ من العاگول
تحت فيّ الگصب و البردي و الچولان داير حول
احبّ امضيفنا المفروش حِصران و نمد و بلول
و الحطب يمّه تلول مثل اوّل
احبّ اتنشّگ ابدخّان ذاك اسراينا المشعول
احب ديواننا الليل و نهار الكل وجه محلول
احبّ اتصنّت لدگّات هاوننا يرن شيگول
احبّ المرفعة و ذيچ الحبوب و ضحچة الكشكول
احبّ اهلي النشامه البالحصاد اتگوم
احبّ احزام ابوي الچان من خوص النخل مفتول
احب رحّاتنا او خبز الشعير الكل وكت مبذول
احب ياوننا و المهباش و المنجل و الناعور و الياييم
و المشحوف و التنبل مثل اوّل
احب ديرة هلي امّ الخير احب اربوعنا الخضره
احب شطنا و سواجينا احب موجاته السمره
سواجينا الغطاها الزود زود الضيم و الحسرة
او شطنا الطمّتّه اهموم السنين او دثّرت صدره
احبّ اشكال ابوي الچان باسم كل وكت ثغره
احب سالوفة اللگّاح احب غنّاوة الشگره
او رفيف البردي و ضحچة اعثوگ النخل للگمرة
احبّ اسگيهن بيديّ السگاهن والدي بعمره
احبّ ارجع و اشمّ اتراب ارضنا الچالمسچ عطره
و اشابگهن ابفروند الامل و العشگ و العشرة
و اگلّ الهن يا نخلاتي الشتلتن بالگلب جمرة
انا ردّيت لا تبچن بعد مو خلصت الهجرة
و اريد اغسل ابدمعاتي عقيق ادموعچ الصفره
و اجاچ الماي يتهاده او خوصچ بعد لا يذبل
خل تترادف السعفات خلّ الگلب يتدلّل
مثل اوّل مثل اوّل
الشاعر شیخ ابراهیم الدیراوی